Ribadeo porta norte

O alcalde, Fernando Suárez, presentou esta mañá en Xixón o paquete turístico "Ribadeo porta norte" que achegará a turistas de Asturias a esta vila durante as fins de semana de xuño e as dúas primeiras do mes de xullo. O rexedor agarda superar a cifra dos 400 que acudiron á vila no tren de Feve desde Xixón o ano pasado. Unha iniciativa que é posible grazas á Área de Turismo da Deputación de Lugo, a través da súa Vicepresidencia terceria, a Feve e ao Concello de Ribadeo.

Fernando Suárez, presenta hoxe en Xixón, xunto con representantes de Feve e da Deputación de Lugo o paquete turístico Ribadeo porta norte. O rexedor asegurou que "por segundo ano consecutivo o que se pretende é atraer turistas a Ribadeo, atraer un tipo de turismo de cercanías, que é o que máis pode estar de actualidade debido á situación económica e á crise, e a xente quere moverse, pero faino en rangos ou en distancias moito máis cortas".

O programa consiste na realización de excursións en tren de dous días de duración que partirán desde Xixón e chegarán a Ribadeo onde pernoctarán e desde onde se desprazarán a coñecer outros puntos da Mariña e do Occidente asturiano. Fernando Suárez dixo que "é unha niciativa moi boa que levamos adiante grazas á Área de Turismo da Deputación, a través da súa Vicepresidencia terceira, senón sería imposible levar esto adiante polo custe económico que supón subvencionar unha serie de paquetes turísticos para que ao turista último lle sexa atractivo".

Suárez Barcia lembrou que "o ano pasado con esta iniciativa achegáronse a Ribadeo unhas 400 persoas en tren e contamos que este ano sexan máis. Ribadeo porta norte collerá todos os fins de semana do mes de xuño e os dous primeiros de xullo e pretendemos que non só veñan turistas asturianos (ainda que son os que máis van vir) senón que tamén cheguen desde Cantabria e desde País Vasco a subir neste tren que partirá desde Xixón. O custe é de 124 euros nos que se inclúe aloxamento de fin de semana, comidas e desprazamentos con visitas guiadas a Ribadeo, Castropol e Mondoñedo".

O alcalde de Ribadeo engadiu que "se trata de facer atractivo este paquete turístico para diferentes puntos da comarca, tendo como partida Ribadeo. A nosa vila está a ser un referente en cuestión de hostelería, restauración e todo este tipo de servizos orientados tamén ao turismo e é bó que as administracións se impliquen para este tipo de iniciativas que máis aló da súa duración todos os que veñan si quedan contentos co noso concello e da profesionalidade dos nosos profesionais seguramente voltarán e falarán ben de nós que é do que se trata".